Abaganga batewe impungenge n’abirukira gusaba gukurwa amenyo

Abaganga bavura amenyo n’indwara zo mu kanwa bagaragaza ko hari abaturage bagifite imyumvire y’uko iryinyo rirwaye rigomba gukurwa, mu gihe intambwe yo kurikura yakabaye iza nyuma y’uko izindi nzira zose zirimo n’izo kurihoma zananiranye.

U Rwanda rwifatanyije n’Isi yose mu kwizihiza Umunsi Mpuzamahanga wo kwirinda indwara zo mu kanwa n’amenyo kuri uyu wa 27 Werurwe 2018.
Iki gikorwa cyabereye mu Karere ka Gasabo, i Nyagatovu mu Murenge wa Kimironko no ku ishuri ribanza rya Karama mu Murenge wa Bumbogo ku bufatanye bwa Minisiteri y’Ubuzima, RBC n’Ihuriro Nyarwanda ry’Abavura Amenyo n’indwara zo mu kanwa mu Rwanda.
Abanyeshuri bo ku ishuri ribanza rya Karama kimwe n’abaturage ba Nyagatovu, bigishijwe uko basukura amenyo, n’uko bakwirinda indwara ziyibasira, aho buri wese wasuzumwe yanahabwaga uburoso n’umuti usukura amenyo. Kwibanda ku bana kandi ngo bizagenda bizana impinduka mu myumvire, kuko bizageza aho kwita ku menyo biba umuco ku benegihugu.
Umuyobozi w’Ihuriro Nyarwanda ry’Abavura Amenyo n’indwara zo mu kanwa mu Rwanda, Uwamwezi Christine yabwiye IGIHE dukesha iyi nkuru, avuga ko abavura amenyo bagihangayikishijwe n’uko hari abaturage bagifite imyumvire y’uko bagomba kwikuza amenyo uko babonye.
Yagize ati “Rwose abantu bumve ko iryinyo ari urugingo rukomeye rw’agaciro nk’izindi, buri wese yumva ko uko atajya kubwira muganga ngo nkuramo ijisho cyangwa ugutwi, banumve ko ntawe ukwiye kwisabira muganga w’amenyo ngo arimukuriremo uretse gusa mu gihe bibaye ngombwa ko rikurwa, cyangwa ari nk’impanuka ibayeho.”
Mu nama Uwamwezi atanga harimo ko buri wese akwiye koza mu kanwa abyutse, ku manywa na nijoro mbere yo kuryama kuko kurarana ibiryo mu kanwa atari byiza ku menyo.
Umwe mu bana bahawe amasomo y’uko bita ku menyo ku ishuri rya Karama, Tuyishimire Jean De Dieu, yagize ati “Ikintu numva kidasanzwe mu masomo nahawe, ni ukuntu nafata amenyo yanjye neza ntashirire, nkajya nyakorera isuku, nkoresha uburoso n’umuti wabugenewe.”
Muri iki gikorwa by’umwihariko ku Kigo cy’Amashuri Abanza cya Karama, mu bana 1200 basuzumwe indwara z’amenyo, abagera kuri 270 basanzwe barwaye, basezeranywa kuzavurwa nyuma y’amezi ane mu gihe i Nyagatovu ho hasuzumwe 300 muri bo 100 bagasanganwa uburwayi bw’amenyo.
Nubwo ubuvuzi bw’amenyo no mu kanwa muri rusanze bumaze gutera imbere mu Rwanda ariko Ibigo Nderabuzima 15 mu gihugu ni byo bifite serivisi yo kuvura amenyo. Icyakora byiyongera ku bitaro byose mu gihugu bisanzwe biyavura.
Uwamwezi yavuze ko akurikije imibare itangwa n’Ikigo gishinzwe Ubuzima mu Rwanda, abarwayi basaga 60% bagana amavuriro bivuza bataha baba bafite ikibazo cy’amenyo mu gihe abize iby’ubu buvuzi mu cyiciro cya kabiri cya kaminuza batarenze 420.